د چارچۆڤێ پێشڤەبرنا پەیوەندیێن زانستی و گرێدانا پڕۆگرامێن خواندنێ ب بازارێ کاری ڤە، ڕۆژا دووشەمبی ڕێکەفتی 01/06/2026، ب ئامادەبوونا هێژا سەرۆکێ زانکۆیا زاخۆ (پ. د. دیار عبدالکریم سعید) ، یاداشتنامەیەکا لێکتێگەهشتنێ یا زانستی دگەل سەنتەرێ "FinAce" یێ شیرەتکاریا دارایی، ژمێریاری و ئەکادیمی هاتە ئیمزاکرن.
ئەڤ ڕێککەفتنە ب مەرەما پەرەپێدانا هەڤکاریا هەڤپشک د بوارێ زانستی دا هاتە ئەنجامدان، ب تایبەتی د ڕێکا بکارئینانا تەکنۆلۆژیا نوی و پرۆگرامێن پێشکەفتی یێن ژمێریاری، دا کۆ شیانێن قوتابیان بهێنە بەرهەڤکرن بۆ دابینکرنا پێدڤیێن بازارێ کاری و ب دەستڤەئینانا باشترین دەلیڤێن کاری د پاشەڕۆژێ دا.
خالێن سەرەکی یێن ڕێکەفتنێ:
• دابینکرنا پڕۆگرامێ "دەفتەرە": ل دویڤ ڤێ یاداشتنامەیێ، سەنتەرێ FinAce دێ ڕابیت ب دابینکرنا پڕۆگرامێ ژمێریاری یێ ناڤدار "دەفتەرە" بۆ تاقیگەهێن کۆلیژا کارگێری و ئابووری.
• ڕەخساندنا دەلیڤێن کاری: بەڕێز (د. اسماعیل فواد موسا) ، ڕێڤەبەرێ سەنتەرێ FinAce دیار کر کو سەنتەرێ وان دێ بیتە ئەگەر بۆ دابینکرنا دەلیڤێن کاری بۆ دەرچوویێن پشکا ژمێریاری، ب تایبەتی ئەو قوتابییێن د خۆل و کۆرسێن ڕاهێنانێ یێن پڕۆگرامێ "دەفتەرە" دا د سەرکەفتیبن.
پەیڤا سەرۆکێ زانکۆیێ:
"زانکۆیا زاخۆ بەردەوام د بزاڤان دا یە بۆ پێشڤەبرنا شیانێن پراکتیکی یێن قوتابییان، ئەڤ جۆرە هەڤکارییە ژی دێ بنە کلیلەک بۆ ئامادەکرنا کادرێن خودان شیان کو بشێن ب ئاوایەکێ سەرکەفتی بچنە د ناڤ بازارێ کاری دا."
دەربارەی پڕۆگرامێ "دەفتەرە":
ئەڤ پڕۆگرامە ژ لایێ کۆمپانیا "دەفتەر بۆ تەکنۆلۆژیا و بەرنامێن ژمێریاری و کارگێری" هاتییە بەرهەڤکرن. ئێکە ژ پڕۆگرامێن پێشەنگ و پێشکەفتی د بوارێ ڕێکخستنا دارایی دا، کو هەمی ستاندەردێن ژمێریاری یێن ناڤدەولەتی تێدا بەردەستن و ب شێوەیەکێ بەرفرەهـ ژ لایێ کۆمپانیا و پڕۆژێن جۆدا ڤە دهێتە بکارئینان. ڕاهێنانا قوتابییان ل سەر ڤێ سیستەمی دێ ئەگەرێ سەرەکی بیت بۆ بلندکرنا ڕێژەیا وەرگرتنا وان د بازارێ کارێ ناڤخۆیی و ناڤدەولەتی دا.